ਰੂਸ ਦੀ ਸਿਹਤ ਸੰਸਥਾ Rospotrebnadzor ਨੇ ਦੱਸਿਆ ਕਿ ਪਿਛਲੇ ਹਫ਼ਤੇ ਮਰੀ ਸਾਇਬੇਰੀਆਈ ਪਲੇਗ ਇੰਸਟੀਚਿਊਟ ਦੀ ਇੱਕ ਪ੍ਰਯੋਗਸ਼ਾਲਾ (ਲੈਬ) ਕਰਮਚਾਰੀ ਦੇ ਸੰਪਰਕ ਵਿੱਚ ਆਏ ਕਿਸੇ ਵੀ ਵਿਅਕਤੀ ਵਿੱਚ ਪਲੇਗ ਦੇ ਲੱਛਣ ਜਾਂ ਮਾਮਲੇ ਨਹੀਂ ਮਿਲੇ ਅਤੇ ਦੂਜੇ ਪਾਸੇ ਸਥਾਨਕ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਆਮ ਜੀਵਨ ਇਸ ਨਾਲ ਪ੍ਰਭਾਵਿਤ ਨਹੀਂ ਹੋਇਆ ਹੈ। ਅਧਿਕਾਰੀਆਂ ਅਨੁਸਾਰ, 28 ਸਾਲਾ ਮਹਿਲਾ ਦੀ ਸ਼ੁੱਕਰਵਾਰ ਨੂੰ ਅਣਪਛਾਤੇ ਕਾਰਨਾਂ ਕਰਕੇ ਹੋਏ ਨਮੋਨੀਆ ਨਾਲ ਮੌਤ ਹੋ ਗਈ ਸੀ। ਇਸ ਘਟਨਾ ਨੇ ਅੰਤਰਰਾਸ਼ਟਰੀ ਪੱਧਰ ‘ਤੇ ਚਿੰਤਾ ਪੈਦਾ ਕਰ ਦਿੱਤੀ ਸੀ ਅਤੇ ਅਮਰੀਕਾ ਨੇ ਇਸ ਮਾਮਲੇ ‘ਤੇ ਨੇੜਿਓਂ ਅੱਖ ਰੱਖੀ ਹੋਈ ਸੀ । ਸਿਹਤ ਨਿਗਰਾਨ ਸੰਸਥਾ ‘ਰੋਸਪੋਤਰੇਬਨਾਦਜ਼ੋਰ’ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇਰਕੁਤਸਕ (Irkutsk) ਦੀ ਇਸ ਪਲੇਗ ਰਿਸਰਚ ਇੰਸਟੀਚਿਊਟ ਦੇ ਸਟਾਫ਼ ਵਿੱਚ ਪਿਛਲੇ 10 ਦਿਨਾਂ ਦੌਰਾਨ ਕੋਈ ਛੂਤ ਦੀ ਬੀਮਾਰੀ ਦਰਜ ਨਹੀਂ ਕੀਤੀ ਗਈ ਹੈ। ਮ੍ਰਿਤਕ ਮਹਿਲਾ ਦੇ ਸਰੀਰ ਦੀ ਵਿਆਪਕ ਜਾਂਚ ਤੋਂ ਬਾਅਦ ਅਜਿਹਾ ਕੋਈ ਵੀ ਜੀਵਾਣੂ (ਮਾਈਕ੍ਰੋਓਰਗੈਨਿਜ਼ਮ) ਨਹੀਂ ਮਿਲਿਆ ਜੋ ਉਸ ਦੇ ਕੰਮ ਨਾਲ ਜੁੜਿਆ ਹੋਵੇ। ਸੰਸਥਾ ਦਾ ਦਾਅਵਾ ਹੈ ਕਿ “ਜਨਤਕ ਸਿਹਤ ਕਾਨੂੰਨਾਂ ਅਨੁਸਾਰ ਤੁਰੰਤ ਵਿਆਪਕ ਮਹਾਮਾਰੀ-ਰੋਕੂ ਕਦਮ ਚੁੱਕੇ ਗਏ ਸਨ। ਇਸ ਤਹਿਤ ਮਰੀਜ਼ ਦੇ ਸੰਪਰਕ ਵਿੱਚ ਆਏ ਵੱਧ ਤੋਂ ਵੱਧ ਲੋਕਾਂ ਦੀ ਪਛਾਣ ਕੀਤੀ ਗਈ ਅਤੇ ਉਨ੍ਹਾਂ ਨੂੰ ਰੋਜ਼ਾਨਾ ਲੈਬ ਟੈਸਟਾਂ ਲਈ ਹਸਪਤਾਲ ਵਿੱਚ ਡਾਕਟਰੀ ਨਿਗਰਾਨੀ ਹੇਠ ਰੱਖਿਆ ਗਿਆ।”
ਇਰਕੁਤਸਕ ਨੇੜੇ ਸ਼ੇਲੇਖੋਵ ਜ਼ਿਲ੍ਹੇ ਦੀ ਡਿਪਟੀ ਹੈੱਡ ਏਲੇਨਾ ਸੋਫੀਨਾ ਨੇ ਦੱਸਿਆ ਕਿ ਜਿਸ ਖ਼ਤਰਨਾਕ ਬੀਮਾਰੀ ਦਾ ਸ਼ੱਕ ਸੀ, ਉਸ ਦੀ ਪੁਸ਼ਟੀ ਨਹੀਂ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ ਸਾਵਧਾਨੀ ਵਜੋਂ ਕਵਾਰੰਟੀਨ (ਇਕਾਂਤਵਾਸ) ਕੀਤੇ ਗਏ ਲਗਭਗ 60% ਲੋਕਾਂ ਨੂੰ ਛੱਡ ਦਿੱਤਾ ਗਿਆ ਹੈ। ਸਥਾਨਕ ਮੀਡੀਆ ਅਨੁਸਾਰ ਪਹਿਲਾਂ ਲਗਭਗ 200 ਲੋਕਾਂ ਨੂੰ ਕਵਾਰੰਟੀਨ ਕੀਤਾ ਗਿਆ ਸੀ।
ਸ਼ੇਲੇਖੋਵ ਸ਼ਹਿਰ ਵਿੱਚ, ਜਿੱਥੇ ਲੈਬ ਕਰਮਚਾਰੀ ਦੀ ਹਸਪਤਾਲ ਵਿੱਚ ਮੌਤ ਹੋਈ ਸੀ, ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਕੋਈ ਖ਼ਾਸ ਵਿਘਨ ਨਹੀਂ ਪਿਆ, ਹਾਲਾਂਕਿ ਸ਼ੁਰੂਆਤ ਵਿੱਚ ਕੁਝ ਲੋਕਾਂ ਨੇ ਦੁਕਾਨਾਂ ਵਿੱਚ ਸਾਵਧਾਨੀ ਵਜੋਂ ਮਾਸਕ ਪਾਏ ਸਨ। ਅੰਨਾ ਨਾਮ ਦੀ ਇੱਕ ਸਥਾਨਕ ਨਿਵਾਸੀ ਨੇ ਦੱਸਿਆ ਕਿ ਸਥਿਤੀ ਸ਼ਾਂਤਮਈ ਹੈ ਅਤੇ ਲੋਕ ਪਾਬੰਦੀਆਂ ਲਈ ਤਿਆਰ ਸਨ, ਪਰ ਜੀਵਨ ਆਮ ਵਾਂਗ ਚੱਲ ਰਿਹਾ ਹੈ।